அனைவரும் தாய் மொழி, ஆங்கிலம், கூடவே மூன்றாவது மொழியாக பைத்தான் ( லினக்சுடன் ) கற்றுக் கொண்டால், இந்த உலகம் இன்னும் இனிமையானதாகும். மக்கள் அனைவரும் ஒற்றுமையுடன் வாழ வழி ஏற்படும். அந்தப் பொற்காலம் விரைவில் வரட்டும்.

என்று கூறியபோது, மகன் வியன் வியந்து போனான்.

‘அம்மா உனது பிறந்தநாளுக்கு என்ன பரிசு தந்தார்?’

‘GenAI பற்றிய ஒரு தொடர் இன்று இணையத்தில் எழுதத் தொடங்கியுள்ளார். அதுவே சிறந்த பரிசு.’

‘அம்மா எழுத்தாளரா?’

‘ஆமா. திருமணமாகி 14 ஆண்டுகளில், 14 நூல்கள் எழுதியுள்ளார்.’

‘ஆ. நான் பெரியவனாகி அவற்றை எல்லாம் படிப்பேன்.’

‘நீயும் எழுத வேண்டும்’

‘எழுதுவேன் எழுதுவேன். நீங்கள் எத்தனை புத்தகம் எழுதியுள்ளீர்கள்?’

அமைதி. அமைதி. அமைதியோ அமைதி. அமைதிக்கெல்லாம் அமைதி.

‘என்னப்பா சத்தமே காணோம்!’

‘உங்கள் மூன்று பேரையும் பார்த்துக் கொள்ளவதிலேயே எனக்கு தாவு தீர்ந்து விடுகிறது. இதில் எங்கே எழுதுவது?’ ‘எல்லாம் எழுதலாம். போன மாதம் எனக்கும் என் நண்பர்களுக்கும் பைத்தான் வகுப்பு நடத்தினாயே. அதையே எழுதலாமே!’

‘அப்படியே ஆகட்டும். தங்கள் சித்தம் என் பாக்கியம்.’

இன்றைய இந்த உரையாடல் இனிதே முடிந்து, பைத்தான் தொடராக இங்கே தொடர்கிறது.

Swaroop Chitlur எழுதிய ‘A byte of Python’ நூலைத் தழுவி, சற்றே பட்டி, டிங்கரிங் பார்த்து, நான் எழுதும் முதல் நூல் இது. காண்க – python.swaroopch.com/

இரண்டு லட்டு தின்ன ஆசைப்படுவோருக்கு – நண்பர் சையது ஜாபர் விரைவில் தமிழில் பைத்தான் இணைய வழியில் இலவசமாக சொல்லித்தர உள்ளார். விவரங்களுக்கு – parottasalna.com/2025/02/10/%f0%9f%93%a2-python-learning-2-0-call-for-participants-%f0%9f%9a%80/

பாயிரம்

தமிழில் கணினி நுட்ப நூல் முன்னேர்களான மு. சிவலிங்கம், காம்கேர் புவனேஸ்வரி, சுஜாதா, எஸ். தணிகை அரசு, விஜயநிலா, ராஜமலர், ஶ்ரீதரன், என்.சொக்கன், பேராசிரியர் இல. சுந்தரம், நித்யா துரைசாமி, இரா. அசோகன், பிரியா சுந்தரமூர்த்தி, இரா. கதிர்வேல், பயிலகம் கி. முத்துராமலிங்கம், முனைவர் ச. குப்பன், துருவங்கள் நக்கீரன், இன்னும் பல விடுபட்டோர் ஆகியோரை வணங்கி நூலை எழுத முனைகிறேன். இதில் உள்ள நற்கருத்துகள் யாவும் உலகெங்கும் உள்ள கட்டற்ற மென்பொருள் பங்களிப்பாளர்களுக்கு உரித்தாகுக. பிழைகள் யாவும் எனது. பிழைகளை சுட்டிக்காட்டத் தவறாதீர்.

பைத்தான் மொழி

பைத்தான் ஒரு நிரலாக்க மொழி. இது மிகவும் எளிது. அதே நேரத்தில் திறம் மிக்கது. Syntax எனப்படும் நிரல் எழுதும் அமைப்பின் சிக்கல்கள் பெரிதாக இல்லாமல், நினைத்ததை ஆங்கிலத்தில் தெளிவாக எழுதினாலே, அது பைத்தான் நிரல்தான் என்று கூறும் அளவிற்கு இது மிகவும் எளிதாக இருக்கும். அல்கோரிதம் கூட வேண்டாம். புளோ சார்ட் (Flow Chart) வரையத் தெரிந்தாலே, அதை ஆங்கிலத்தில் எழுதினால் அது ஏறக்குறைய பைத்தான் நிரல்தான்.

பைத்தான் தளத்தில் இருக்கும் அறிமுகம்-

பைத்தான், எளிதில் எவரும் கற்கக் கூடிய, திறம் மிக்க நிரலாக்க மொழி. இதில் பலவகை மேம்பட்ட Data Structure (தரவு வகை) உள்ளன. எளிய, ஆற்றல் மிக்க Object Oriented Programming (பொருள் சார் நிரலாக்கம்) திறன் கூட உண்டு. இதன் Syntax(நிரல் கட்டமைப்பு) மிக எளிது. Interpreted முறையில் இயங்குகிறது. அனைத்து இயங்கு தளங்களிலும் (Operating System) செயல்படக் கூடியது. எளிதில் மனதில் நினைக்கும் திட்டங்களை, நிரலாக எழுத உதவுகிறது.

அட. இப்போது தானே சொன்னீர்கள், பைத்தான் மிக எளிது என்று. அதற்குள் பல புரியாத கடமுட கணினி வார்த்தைகளை சொல்கிறீர்களே.

பயம் வேண்டாம். மேலே உள்ளவை, பைத்தான் பற்றி ஒரு பருந்துப் பார்வை அறிமுகம் மட்டுமே. அதில் உள்ளவை எதுவுமே புரியவில்லை என்றாலும் பரவாயில்லை. விரைவில் கற்கப் போகிறோம்.

அதென்ன பெயர்? பைத்தான் ?

Guido van Rossum, படம் எடுத்தவர்: Michael Cavotta. உரிமை: CC BY-NC-ND 4.0

கைடோ வான் ரோசம்(Guido van Rossum), (ரொம்ப ரோசம் கொண்டவர் போல) இவர்தான் பைத்தான் மொழியை உருவாக்கியவர். அவர் BBC தொலைக்காட்சியில் ஒளிபரப்பாகி வந்த “Monty Python’s Flying Circus” என்ற தொடரை விரும்பிப் பார்ப்பார். அதன் பெயரால் ஈர்க்கப்பட்டு, தான் உருவாக்கிய மொழிக்கு ‘பைத்தான்’ என்று பெயர் சூட்டினார். மற்றபடி அவருக்கு பாம்புகளின் மேல் பிரியம் ஏதும் இல்லை. ஆம். பைத்தான் என்றால் மலைப்பாம்பு என்று பொருள். போகட்டும். நல்லவேளை. அவர் நமது நெடுந்தொடர்களைப் பார்க்கவில்லை. ஒரு வேளை அவருக்கு தமிழ் தெரிந்து, நமது தொலைக்காட்சிச் தொடர்களைப் பார்த்திருந்தால், ‘சித்தி’, ‘மெட்டி ஒலி’ என்று நாம் படித்துக் கொண்டிருப்போம்.

1996 ல் அதன் தொடக்கத்தைப்பற்றி கீழ்கண்டவாறு கூறுகிறார்:

ஆறு வருடங்களுக்கு முன் டிசம்பர் 1989 ல் கிருஸ்துமஸ் விடுமுறையின் போது பொழுது போக்கிற்காக ஒரு நிரலாக்க மொழித்திட்டத்தை தேடிக் கொண்டிருந்தேன். என்னுடைய அலுவலகம் முடியிருந்தது ஆனால் நான் வீட்டில் ஒரு கணினி வைத்திருந்தேன். ஒரு புதிய ஸ்கிரிப்டிங் மொழிக்கு மொழிப்பெயர்ப்பு மென்பொருள் தயார் செய்ய முடிவு செய்தேன். ABC மொழிக்கு சந்ததியான இந்த நிரலாக்க மொழி திட்டத்திற்கு பைத்தான் என பெயரிட்டேன். மான்டி பைத்தான் பிளையிங் சர்க்கஸ் என்ற நாடகத்தின் ரசிகனாக இருந்த காரணத்தினால் புதிய மொழிக்கு பைத்தான் எனப் பெயரிட்டேன்.

நன்றி – விக்கிப்பீடியா – ta.wikipedia.org/s/56ne

பைத்தான் மொழியின் சிறப்புகள்

மிக எளிது

ஆம். பைத்தான் மிக, மிக எளிய மொழி. ஒரு பைத்தான் நிரலைப் படித்தால், ஆங்கிலத்தில் எழுதப்பட்ட ஒரு நிரலரின் எண்ண ஓட்டத்தைப் படிப்பது போலவே இருக்கும். சும்மா நீங்கள் எழுத நினைக்கும் நிரலை, ஆங்கிலத்தில் ஒரு வெள்ளோட்மாக எழுதினாலே போதும். அது ஏறக்குறைய பைத்தான் போலவே இருக்கும். இதனால், நாம் நிரல் எழுதுவதில் வரும் சிக்கல்களில் சிக்கி, சின்னாபின்னமாகிப் போகாமல், எளிதில் தப்பித்து விடலாம்.

கற்பது மிக எளிது

எவரும் எளிதில் கற்கலாம். இப்போது பள்ளிகளில் C,C++,Java போன்ற மொழிகளுக்குப் பதிலாக, பைத்தான் மொழியையே முதல் மொழியாக கற்றுத் தரத் தொடங்கிவிட்டனர். பலருக்கும் பைத்தான், தாய் நிரல் மொழி ஆகி வருகிறது.

கட்டற்ற மென்பொருள்

பைத்தான் ஒரு கட்டற்ற மென்பொருள். FLOSS (Free/Libré and Open Source Software)

• இலவசம். ஆம். முழுக்க இலவசம். பைத்தான் மொழியை வாங்க, யாரும் வீட்டை விற்கத் தேவை இல்லை. www.python.org/downloads/ இத்தளத்தில் பதிவிறக்கம் செய்யலாம்.

• பகிரலாம். இணையத்தில் பதிவிறக்கிய பைத்தான் மொழியை, யாவரும் எங்கும் பகிரலாம். தடை ஏதும் இல்லை. பைரசி சிக்கல் ஏதும் இல்லை. பகிர்ந்தால் கைது வாரண்ட் ஏதும் வராது.

• மூல நிரலைக் கூட பெறலாம். பைத்தான் மொழி பெரும்பாலும் C மொழியில் எழுதப்பட்டது. அதன் மூல நிரலைக் கூட பைத்தான் இணைய தளத்தில் இருந்து பதிவிறக்கம் செய்து ஆராயலாம். காண்க – www.python.org/downloads/source/

• மாற்றங்கள் செய்யலாம். பைத்தான் உங்களுக்கு வசதிப்பட்டு வரவில்லையா? அதன் மூல நிரல்தான் இருக்கிறதே. அதை பட்டி டிங்கரிங் பார்த்து உங்களுக்கு ஏற்றவாறு மாற்றிக் கொள்ளலாம்.

• மாற்றங்களை வெளியிடலாம். பட்டி டிங்கரிங் பார்த்தாச்சா? இனி அந்த மாற்றங்களுடன் உங்களுக்கு விருப்பமான பெயரில் வெளியிடலாம். என்ன, இதே உரிமைகளுடனேதான் வெளியிட வேண்டும்.

நீங்கள் என்ன பெயர் வைப்பீர்கள்? BigBoss பிரியர் எனில் Boss என்றே கூட வைக்கலாம். அண்ணன் ‘முத்து அண்ணாமலை’ அவர்கள், தமிழில் ஒரு நிரலாக்க மொழி உருவாக்கி (பைத்தான் போன்றதே) ‘எழில் மொழி’ என்று வெளியிட்டுள்ளார். அவர் ‘எழில்’ என்று ஒரு நெடுந்தொடர் பார்த்திருப்பார் போல. 🙂 அவரிடமே கேட்டேன். ‘அதெல்லாம் இல்லைங்க! பள்ளிக்கு பேருந்தில் செல்லும் காலங்களில் கண்ட ஒரு அழகிய வீட்டின் பெயர் அது. அதையே ஒரு அழகியல் காரணமாக வைத்தது.’ என்றார். ta.wikipedia.org/s/27xm

மேற்கண்ட உரிமைகள் அனைத்தையும் தருவதே ‘கட்டற்ற மென்பொருள்’ உரிமை. Free Software / Open Source எனப்படுபவை. இங்கு Free என்பது இலவசம் அல்ல. ‘Freedom. கட்டற்ற’ என்ற பொருளில் வழங்கப் படுபவை.

மனிதர் அனைவரின் மீதும் பேரன்பு கொண்ட, நிரலாளர்கள் அனைவரும், தமது நிரல் அறிவையும், அனுபவத்தையும், அனைவருக்கும் இலவசமாகப் பகிர்ந்து கொள்ளும் அதிசயமான ஒரு கட்டமைப்பே ‘கட்டற்ற மென்பொருட்கள்’ உருவாக்கம் ஆகும். கட்டற்ற மென்பொருளாக பைத்தான் மொழியை வெளியிட்டதே அதன் மாபெரும் சிறப்பு அம்சம். முதல் பதிப்பு உருவான நாள் முதல், இன்று வரை பைத்தான் மொழி உலகெங்கும் உள்ள பங்களிப்பாளர்களால், நாளொரு மேனியும் பொழுதொரு வண்ணமுமாக, சிறப்பாக வளர்ந்து வருகிறது.

உயர் நிலை மொழி

நாம் பைத்தான் மொழியில் நிரல் எழுதும் போது, எதைப் பற்றியும் கவலைப்படாமல், நினைப்பதை எழுதித் தள்ளலாம். கணினியில் நினைவக மேலாண்மை (Memory Management, Garbage Collection) போன்ற அடிப்படை விசயங்களை பைத்தான் மொழியே பார்த்துக் கொள்ளும். பல மொழிகளில் அவற்றை நாம் தான், கவனித்து, அடிக்கடி சரி செய்ய வேண்டும்.

Portable – எல்லா இயக்குதளங்களிலும் (Operating System) பைத்தான் இயங்கிறது

பைத்தான் கட்டற்ற மொழி. ஆகையால், பல்வேறு இயக்குதளங்களை பயன்படுத்துபவர்கள், பைத்தான் மொழியை தாம் விரும்பும் இயக்குதளத்தில் பைத்தான் மொழியை மாற்றி, எளிதில் நிறுவும் வகையில் வழங்குகின்றனர். பெரும்பாலான பைத்தான் நிரல்கள் எந்த இயக்குதளத்தில் போட்டாலும், ஒரே மாதிரியாகவே செயல்படுபவை.

பின்வரும் இயக்குதளங்களில் பைத்தான் கிடைக்கிறது. GNU/Linux, Windows, FreeBSD, Macintosh, Android, Solaris, OS/2, Amiga, AROS, AS/400, BeOS, OS/390, z/OS, Palm OS, QNX, VMS, Psion, Acorn RISC OS, VxWorks, PlayStation, Sharp Zaurus, Windows CE and PocketPC!

அம்மாடியோவ். இவ்வளவு இயக்குதளங்கள் இருக்கின்றனவா? அதுவே எனக்கு இப்போதுதான் தெரியும்.

கூடுதல் வசதி. Kivy என்ற நிரல் தொகுப்பு மூலம், கணினி, ஆன்டிராய்டு, ஐபோன் கருவிகள் அனைத்திற்கும் செயலிகளை உருவாக்க இயலும்.

Interpreted (வரி வரியாக இயக்குதல்)

C/C++ மொழிகளில் நிரல் எழுதி, அதை இயக்க, நிரலை Compile என்று ஒரு வேலை செய்ய வேண்டும். அப்படி Compile செய்த பின், நமக்கு ஒரு Binary கோப்பு ஒன்று கிடைக்கும். அது கணினிக்கு மட்டும் புரியும் வகையில் இருக்கும். நாம் திறத்து பார்த்தால் காலகேய மொழியில் எழுதியது போல இருக்கும். யாருக்கும் ஒன்றும் புரியாது. ஆனால் அந்த பைனரி கோப்பை வேறு கணினியில் இயக்கினால், நன்றாக இயங்கும். பைனரியாக மாற்றிய பிறகு, மூல நிரல் தேவைப்படாது.

ஆனால், பைத்தான் அப்படி அல்ல. இங்கு, பைனரிக்கோ, காலகேய மொழிக்கோ இடம் இல்லை. எந்த கணினியில் நிரலை இயக்க வேண்டுமானாலும், அங்கு மூல நிரலை மொத்தமாக சேமிக்க வேண்டும். பிறகே நிரலை இயக்க வேண்டும். ஒவ்வொரு வரியாக நிரல் படிக்கப்பட்டு இயக்கப் படுகிறது. இவ்வாறு செய்வதே Interprete எனப்படுகிறது.

Object Oriented – பொருள் சார் நிரலாக்கம்

நிரல் எழுதும் முறையில் Procedure-oriented programming, object-oriented programming என இரண்டு வகைகள் உள்ளன. procedure-oriented வகை மொழிகளில், நிரலானது சிறு சிறு துண்டுகளாள எழுதி, பிறகு ஒன்றாக கோர்க்கப் படுகிறது. அத்துண்டு நிரல்களை procedures அல்லது functions என்போம். object-oriented வகை மொழிகளில், functions உடன் பல்வேறு தகவல்களையும் ஒன்றிணைத்து objects பல உருவாக்கி, அவற்றைப் பயன்படுத்தி நிரல் எழுதுவோம். பைத்தான் மொழியில் இரண்டு முறைகளிலும் நிரல் எழுதலாம்.

ஒன்றும் புரியவில்லை அல்லவா? பரவாயில்லை. விரைவில் இவற்றை கற்றுக் கொள்ளலாம். எனக்குமே ஆரம்ப காலங்களில் இவை எதுவும் புரியவில்லை. இப்போது எல்லாம் புரிந்து விட்டதா என்று கேட்க மாட்டீர்கள் என்று நம்புகிறேன். 😉

Extensible – பிற மொழிகளை இணைத்தல்

சில காரணங்களுக்காக, வேறு மொழியில் எழுதப்பட்ட நிரல் அல்லது பைனரி கோப்பை, பயன்படுத்த நேரிடும். அப்போது அவற்றை நமது பைத்தான் நிரல் மூலம் அப்படியே இயக்கிக் கொள்ளலாம்.

Embeddable – பிற மொழிகளில் இயங்குதல்

C/C++ போன்ற பிற மொழிகளின் நடுவிலே கூட பைத்தான் நிரலை எழுதிக் கொள்ளலாம்.

எக்கச்சக்கமான துணை நிரல்கள் (Library)

பைத்தான் மொழியின் மாபெரும் பலமே, அதில் கிடைக்கும் பல்லாயிரம் துணை நிரல்களே. பைத்தான் மொழியின் கூடவே வருவது The Python Standard Library. இதுவே மிகவும் பெரியது. இதிலேயே, பொதுவான நிரல் தேவைகளுக்கான அனைத்து வசதிகளும் உள்ளன.

regular expressions,documentation generation, unit testing, threading, databases, web browsers, CGI, FTP, email, XML, XML-RPC, HTML, WAV files, cryptography, GUI (graphical user interfaces) போன்ற பணிகளை எளிதில் செய்து முடிக்கலாம். இதற்கான துணை நிரல்கள் அனைத்துமே பைத்தான் கூடவே நிறுவப்படுகின்றன. இதனால் பைத்தான் மொழியை ‘Batteries Included’ என்று அன்போடு அழைக்கிறோம்.

இது மட்டுமல்லாமல், பல்லாயிரம் பங்களிப்பாளர்கள் தாம் உருவாக்கும் பல்வேறு துணை நிரல்களை, ஒரு இணையக் கிடங்கில் பகிர்ந்து வருகின்றனர். உங்களுக்கு கணினியில் எந்த செயலை பைத்தான் மூலம் செய்ய வேண்டும் என்றாலும், அதற்கான துணை நிரல் இங்கு கிடைக்கும். காண்க Python Package Index.

Summary

எல்லாவற்றையும் எளிதில் செய்து முடித்துவிடும் அலாவுதீன் அற்புத விளக்காக பைத்தான் விளங்குகிறது. இதன் மூலம் எண்ணிய யாவற்றையும் திண்ணமுடன் விரைவில் செய்து முடிக்கலாம்.

சிறு குழந்தைகள் Building Blocks எனப்படும் சிறு துண்டுகள் கொண்டு, விரும்பும் வகையில் பெரிய பொம்மைகளை செய்வதைக் காணலாம். அதே போலத்தான் பைத்தான் நிரலாக்கமும் இருக்கும். தேவையான அனைத்து துணை நிரல்களும் ஏற்கெனேவே நிறுவப் பட்டிருக்கும். அல்லது pypi.python.org/pypi தளத்தில் கிடைக்கும். அவற்றைக் கொண்டு, பெரிய பெரிய மென்பொருட்களை எளிதில் உருவாக்கலாம். என்ன செய்ய வேண்டும் என்ற தெளிவும், சற்றே நிரலாக்கப் பழக்கமும் இருந்தால் போதும்.

ஒன்றா, இரண்டா, மூன்றா ? பைத்தான் பதிப்புகள்

பிப்ரவரி 20, 1991 அன்று வெளியிடப்பட்ட பைத்தான் மொழி, இன்று வரை தொடர்ந்து, சீரும் சிறப்புமாக வளர்ந்து வருகிறது. அதன் சமீபத்திய பதிப்பு 3.9.6

ஆனாலும், பல பழைய கணினிகளில் பைத்தான் 2 தான் கிடைக்கும். இணையத்தில் கிடைக்கும் பல்வேறு ஆவணங்கள், பாடங்கள், வலைப்பதிவுகள் போன்றவை பைத்தான் 2 சார்ந்தே இருக்கலாம்.

நாம் இந்த நூலில், பைத்தான் 3 மட்டுமே பயன்படுத்தப் போகிறோம். நீங்களும் பைத்தான் 3 ல் இருந்தே தொடங்குங்கள். இதில் பல மேம்பட்ட வசதிகள் உள்ளன. அவற்றை பயன்படுத்தி மகிழ்வோம்.

ஒரு பதிப்பை முறையாகக் கற்றாலே போதும். அதற்கு முந்தைய அல்லது பிற்காலத்தில் வரப்போகும் பதிப்புகளை எளிதில் ஒப்பு தோக்கி, நாமே விரைவில் கற்றுக் கொள்ளலாம்.

பைத்தான் 2 க்கும் 3 க்கும் உள்ள வேறுபாடுகளை இங்கே காணலாம்.

• The future of Python 2 [Porting
• Python 2 Code to Python
• 3](https://docs.python.org/3/howto/pyporting.html) [Writing code
• that runs under both Python2 and
• 3](https://wiki.python.org/moin/PortingToPy3k/BilingualQuickRef)
• Supporting Python 3: An in-depth guide

பெருந்தலைகள் என்ன சொல்கிறார்கள்?

கணினித் துறையில் பெருந் தலைவரகள் சிலர் பைத்தான் மொழி பற்றி என்ன சொன்னார்கள் என்று காண்போம்.

• Eric S. Raymond (எரிக் ரேமண்ட்) ரேமண்ட் துணிக்கடை முதலாளி அல்ல. “The Cathedral and the Bazaar” என்ற புகழ்பெற்ற நூலின் ஆசிரியர். Open Source என்ற சொற்றொடரை உருவாக்கியவர். பைத்தான் தனக்கு மிகவும் பிடித்த மொழி. என்கிறார். அவரது இந்தக் கட்டுரையே, நானும் என்னைப் போன்ற பலரும் பைத்தான் பற்றி அறிந்து, கற்க ஆர்வம் ஊட்டியது.

• Bruce Eckel இவர் புகழ்பெற்ற ‘Thinking in Java’ , ‘Thinking in C++’ நூல்களின் ஆசிரியர். ‘யாமறிந்த மொழிகளிலே, பைத்தான் போல் திறன் மிக்கது, வேறு எதுவும் இல்லை. பைத்தான் தான், நிரலர் வாழ்க்கையை எளிதாக்குகிறது’ என்கிறார் இந்த நவயுக கணினி பாரதி. ஆம். இது வசிஷ்டர் வாயால் பிரம்ம ரிஷி பட்டம் பெறுவதற்கு ஒப்பானது. முழு பேட்டி இங்கே

• Peter Norvig இவர் ஒரு புகழ் பெற்ற Lisp மொழி ஆய்வாளர். கூகுள் தேடுபொறியின் தரம் சார்ந்த துறையின் இயக்குனர். பைத்தான் நிரல் எழுதுவுது என்பது, மனதில் உள்ள திட்டத்தை, அப்படியே எழுதிவிடுதல் போன்றதே. தனியே நிரல் எழுத, அதிகம் மெனக்கெட வேண்டியதில்லை.. கூகுள் நிறுவனத்தில் பைத்தான் பெரும் பங்கு வகிக்கிறது என்கிறார். மேலும் இது பற்றி கூகுள் பணிகள் இணைப்பில் பைத்தான் வல்லுனர்களுக்கு உள்ள வேலைகளைக் காணலாம்.

– தொடரும்

த.சீனிவாசன் tshrinivasan@gmail.com